Ысык-Көл областынын Административдик  сотунда айрым мыйзам актыларына кирген өзгөртүүлөрдү талкуулоого арналган тренинг болуп өттү. Иш чарага  Ысык-Көл областынын жергиликтүү сотторунун судьялары катышышты.

Тренингдин биринчи бөлүгүндө Кыргыз Республикасынын Жарандык процесстик кодексине 2020-жылдын 11-апрелинде киргизилген өзгөртүүлөр боюнча маселелер каралды.  Ысык-Көл областтык сотунун  жарандык жана экономикалык иштер боюнча соттук  коллегиясынын  судьялары Мира Шамбетова жана Уланбек Суранчиев мыйзамдарга киргизилген жаңы өзгөртүүлөрдү талкуулап,  түшүндүрмөлөрдү беришти.

Тренингдин экинчи бөлүгүндө Ысык-Көл областтык сотунун  жазык иштери жана жоруктар жөнүндөгү иштер боюнча соттук  коллегиясынын төрайымдын орун басары Анара Омуралиева тарабынан Улуу Ата Мекендик согуштагы Жеңиштин 75-жылдыгына жана 2010-жылдагы Элдик Апрель революциясынын 10-жылдыгына байланыштуу кабыл алынган мунапыс жөнүндөгү мыйзам ортого салынып, пикирлер угулду.

Иш чаранын соңунда  Ысык-Көл областтык сотунун төрайымы Гулкайыр Алиева судьяларга катышканы үчүн ыраазычылык билдирип, Кыргыз Республикасынын Жарандык процесстик кодексине өзгөртүүлөр менен толуктоолорду киргизүү үчүн сунуштарды даярдоо керектигин белгиледи.

Ысык-Көл областтык сотунун басма сөз катчысы

                                                                                                                     Гульзада Аширбаева