Бүгүн, 2025-жылдын 28- ноябрында, Кыргыз Республикасынын Жогорку сотунун төрагасынын орун басары Нургуль Бакирова КМШга мүчө мамлекеттердин Парламенттер аралык ассамблеясынын эл аралык байкоочуларын кабыл алды.
Жолугушууга Тажикстан Республикасынын Мажлиси Олинин Мажлиси миллинин Конституциялык негиздерди, адамдын жана жарандардын укуктарын, эркиндиктерин жана мыйзамдуулукту камсыздоо боюнча комитетинин төрагасы, КМШнын аталган ассамблеясынын эл аралык байкоочулар тобунун координатору Ватанзода Махмадали Махмадулло башында турган 30га жакын байкоочулар, ошондой эле Бишкек шаарынын Административдик сотунун төрагасы Азис Эшалиев, Бишкек шаарынын административдик сотунун судьясы Эрмек Иманалиев, Жогорку соттун Административдик иштер боюнча судьялардын ишин камсыздоо бөлүмүнүн башчысы Айкөкүл Маатова жана Коом менен байланышуу, массалык маалымат каражаттары жана эл аралык катнаш бөлүмүнүн улук референти Даир Абдуллоев катышышты.
Өз сөзүндө Нургуль Бакирова, демократиялык мамлекеттерде шайлоо бийликтин легитимдүүлүгүнүн көрсөткүчү жана жарандардын эркин тандоосун камсыз кылган эң маанилүү институттардын бири экендигин айтты.
“Шайлоо процессинин адилеттүүлүгү, ачык-айкындыгы жана мыйзамдуулугу — демократиянын негизи. Бул принциптерди камсыз кылууда соттордун ролу өтө чоң.
Шайлоо маалында соттор өз функцияларын толук жана натыйжалуу аткара алышы үчүн алар калыс, көз карандысыз жана жогорку квалификацияга ээ болушу зарыл. Башкача айтканда, соттор саясий партиялардын, талапкерлердин, мамлекеттик бийликтин башка бутактарынын жана сырттан болгон басымдын таасиринен толугу менен эркин болууга тийиш. Мындан тышкары, шайлоо мыйзамдарын терең билип, жетиштүү укуктук тажрыйбага ээ болуусу абзел.
Кыргыз Республикасынын Конституциясы эл бийлигинин негиздерин жана аларды камсыз кылууда сот бийлигинин ордун аныктаган негизги жоболорду өзүндө камтыйт. Айрыкча, Конституцияда эл өз бийлигин түздөн-түз шайлоолор аркылуу жана мамлекеттик бийлик органдары аркылуу жүзөгө ашырары белгиленген. Соттор адамдын укуктарын жана эркиндиктерин, анын ичинде шайлоо укуктарын коргоону камсыз кылат.”, — деп белгиледи Нургуль Бакирова.
Жолугушуунун жүрүшүндө байкоочулар шайлоо мыйзамдарына киргизилип жаткан өзгөртүүлөр боюнча бир катар кызыктырган суроолорун узатты. Нургуль Бакирова бардык берилген суроолорго кеңири түшүндүрмө берди. Анын ичинде шайлоо мыйзамдарынын өркүндөтүлүп жатышы жана сот бийлигинин бул жааттагы ролу тууралуу маалымат берди.
Белгилей кетсек, 2025-жылдын 28–30-ноябрындагы мезгилде КМШга катышкан мамлекеттердин Парламенттер аралык Ассамблеясынын эл аралык байкоочулар тобу 2025-жылдын 30-ноябрына белгиленген Кыргыз Республикасынын Жогорку Кеңешинин депутаттарын мөөнөтүнөн мурда шайлоого кыска мөөнөттүү мониторинг жүргүзөт.
Кыска мөөнөттүү мониторингдин алкагында КМШ ПААнын эл аралык байкоочулары шайлоо өнөктүгүнүн жүрүшү жөнүндө объективдүү түшүнүк түзүү үчүн мамлекеттик бийлик органдарынын жетекчилиги, шайлоону башкаруу жана шайлоо процессинин катышуучулары менен жолугушууларды өткөрүүдө.
https://www.youtube.com/watch?v=_KkgxGlQSmQ
