Борбордук Азия диалог аянтчасынын алкагында «Young Professionals in Justice» аттуу үч күндүк интенсивдүү билим берүү курсу өз ишин жыйынтыктады. Бул иш-чара Казакстандын бардык аймактарынан келген 25 жаштан 32 жашка чейинки курактагы судьялардын, укук коргоо органдарынын кызматкерлеринин, адвокаттардын жана юристтердин башын бириктирди.

Программа юристтердин жаңы муунун кесиптик жактан өнүктүрүүгө жана тажрыйбалуу эксперттер менен ишин жаңыдан баштаган адистердин ортосундагы өз ара аракеттенүүнү бекемдөөгө багытталган. Иш-чарага Казакстандын мамлекеттик мекемелеринин өкүлдөрү, Борбордук Азия жана алыскы чет өлкөлөрдүн эл аралык эксперттери, ошондой эле эл аралык уюмдардын өкүлдөрү катышты.

Кыргыз Республикасынын Жогорку сотунун судьясы Эльмира Байтикова «Нетворкинг жана карьералык келечек» аттуу интерактивдүү сессияда баяндама жасады. Аталган сессиянын алкагында тажрыйбалуу судьялар менен прокурорлор практикалык кейстер менен бөлүшүп, кесиптик этика маселелерин талкуулашты жана карьералык өсүү боюнча сунуштарын беришти.