Урматтуу кесиптештер жана сот аппаратынын кызматкерлери!

Сиздерди Кыргыз Республикасынын сот тутумунун кызматкери күнү – кесиптик майрамыңыздар менен куттуктайм!

Сот системасынын ийгиликтүү иштеши жана анын бедели түздөн-түз ар бир кызматкердин калыстыгынан, принципиалдуулугунан, жогорку кесипкөйлүгүнөн жана жоопкерчиликтүү мамилесинен көз каранды.

Калыс, көз карандысыз жана объективдүү сот адилеттиги жарандардын мамлекеттик бийликке болгон ишенимин бекемдей алат.

Сот тутумунун мамлекеттеги ордун өзгөчө белгилеп кетүү керек. Анткени, сот тутумунун сапаттуу иштеши укуктук мамлекеттин үстөмдүк кылышын, толук кандуу жарандык коомдун калыптанышын жана улуттук экономиканын өнүгүшүн камсыз кылат.

Адилеттүүлүктү камсыз кылуу сот бийлигин алып жүргөн судьяларга жүктөлгөн. Биздин ар бирибиз берген антыбызга бекем туруп, сот адилеттигине болгон коомдун ишенимин арттыруу үчүн бардык күч-аракетибизди жумшоого бел байлашыбыз керек.

Мыйзамдуу жана негиздүү сот чечимдери терең билимдин жана судьянын квалификациясынын негизинде гана чыгарылбастан, адеп-ахлак, абийир жана адамдык сапаттар менен бекемделиши керек.

Адилеттүүлүктү орнотууга өз салымын кошуп жаткан ар бириңиздерди майрамыңыздар менен куттуктайм!

Сиздердин ардактуу эмгегиңиздер дайыма ийгилик менен коштолсун!