Бүгүн, 2025-жылдын 1-апрелинде, Медербек Сатыевдин төрагалыгы астында Кыргыз Республикасынын Жогорку сотунун төрагасынын буйругу менен түзүлгөн сот тутумунун санариптик өнүктүрүү боюнча координациялык жумушчу топтун биринчи жыйыны өттү.

Жумушчу топко кылмыш иштери жана жарандык иштер боюнча судьялар, «Адилет сот» маалымат технологиялары мекемесинин өкүлдөрү, ошондой эле көз карандысыз эксперттер кирди.

Медербек Сатыев жумушчу топ сот системасын санариптештирүү боюнча иштин натыйжалуулугун жогорулатуу максатында түзүлгөнүн белгиледи. Отурумдун жүрүшүндө ишти оптималдаштыруу үчүн багыттар боюнча милдеттерди бөлүштүрүү менен бирдиктүү жумушчу топ түзүлгөндүгү баса белгиленди.

Төрага жыйындын катышуучуларына Кыргыз Республикасынын Президенти Садыр Жапаровдун Судьялардын  XIII курултайынын  жүрүшүндө айткан сөздөрүн эскертип, сот тутуму өз ишинде санариптик технологияларды киргизүүнү тездетиши керек экенин өзгөчө белгиледи.

Отурумдун алкагында төрагага сот системасын санариптештирүүнүн азыркы абалы тууралуу маалымат берилди.

Ошондой эле, Кыргыз Республикасынын Башкы прокуратурасынын «Укук» мамлекеттик мекемеси менен биргеликте иштеп жаткан кылмыш иштери боюнча санариптештирүү блогу боюнча жумушчу версия сунушталды.

Жыйында жумушчу топтун алдында турган негизги маселелер талкууланып, ишмердүүлүктүн артыкчылыктуу багыттары аныкталды.

Жыйындын соңунда Медербек Сатыев бир нече тапшырмаларды берип, алардын аткарылышы үчүн кыска мөөнөттөрдү белгиледи.