Ушуга байланыштуу окуу программасында алардын кесиптик ишине түздөн-түз тиешелүү темалар камтылды. Биринчи инстанциядагы соттордо иш кагаздарын жүргүзүү иштерине өзгөчө көңүл бурулуп, угуучулар соттордун аппарат жетекчилеринин укуктук статусу жана функционалдык милдеттери, иш кагаздарын уюштуруу, жарандык жана кылмыш иштерин тариздөө жана даярдоо, ошондой эле буюм далилдерин кабыл алуу, эсепке алуу, сактоо жана жок кылуу, архивдик иштерди жана материалдарды жок кылуунун тартиби жана мөөнөттөрү сыяктуу актуалдуу темаларды окушту.

3 күндүк теманы камтыган бул окутууда Свердлов райондук сотунун судьясы, Сот адилеттигинин жогорку мектебинин окутуучусу Узакпаева Гулзат Каныбековна лектор болду.

Белгилей кетсек, Кыргыз Республикасынын Жогорку сотунун Пленумунун Токтому менен бекитилген Кыргыз Республикасынын Жогорку сотунда жана жергиликтүү соттордо иш кагаздарын жүргүзүү боюнча нускаманын, 3-главасынын, 11-пунктуна ылайык, ошондой эле, Кыргыз Республикасынын Жогорку сотуна караштуу Сот департаментинин буйругу менен бекитилген Кыргыз Республикасынын жергиликтүү сотторунун Аппараты жөнүндө Жобого ылайык бөлүм башчы сот аппаратынын ишин жетектейт, канцеляриянын жана архивдин ишин уюштурат, иш кагаздарын жүргүзүү жана документтик камсыздоо, ошондой эле сот жана иш кагаздарын жүргүзүү процесстерин башкаруунун автоматташтырылган системасынын иштеши үчүн жооп алышат.

Ушул Жобонун негизинде, ошондой эле Сот адилеттигинин жогорку мектеби тарабынан электрондук форматта берилген окуу-методикалык материалдарды колдонуу менен окутуудан өткөн жетекчилер алган билимдерин өздөрүнүн кесиптик ишмердүүлүгүндө натыйжалуу колдоно алышат жана аларды соттордун аппараттарынын кызматкерлери менен бөлүшсө болот.

Окуу аяктагандан кийин катышуучулар жыйынтыктоочу тестирлөөдөн өтүп, анын жыйынтыгы боюнча аларга тиешелүү күбөлүктөр тапшырылды.