Нарын облустук сотунда Аксакалдар сотунун өкүлдөрүнө методикалык жана консультациялык жардам көрсөтүү максатында тегерек стол өткөрүлдү.
Иш чаранын жүрүшүндө Нарын облустук сотунун төрагасынын орун басары Шарипбек Жунусов жарандардын укуктарын коргоп, коомдук тартипти сактоодо жана чыр-чатактарды алдын алууда аксакалдар сотторунун мааниси чоң экендигин баса белгиледи.
Нарын шаардык сотунун төрагасы Сотибек Осмонов 2024-жылдын 19-февралындагы Аксакалдар соттору жөнүндөгү Кыргыз Республикасынын мыйзамы боюнча баяндама жасап, мыйзамга түшүндүрмө берди.
С.Осмоновдун пикиринде: “Мыйзамга ылайык, Аксакалдар соттору өз ишинде Кыргыз Республикасынын мыйзамдарына каршы келбеген, Кыргызстан калкынын тарыхый калыптанган салттарынан жана үрп-адаттарынан келип чыккан моралдын жана адеп-ахлактын ченемдерин жетекчиликке алат”.
Нарын шаардык Аксакалдар сотунун төрайымы Гүлбүбү Байбугуева Аксакалдар сотунун ишмердүүлүгү, жетишкендиктери жана көйгөйлөрү жөнүндө маалыматы менен бөлүштү.
Аксакалдар соту кылмыштарды алдын алуу максатында коомдук жыйындарда, окуу жайларында жаштарга, кыз-келиндерге, окуучуларга, студенттерге зордук-зомбулуктун алдын алуу, балдар иштери ж.б. тартиптин, мыйзамдын сакталышы жаатында түшүндүрүү иштерин үзгүлтүксүз жүргүзүп келишүүдө.
Нарын шаардык мэриясынын юристи Мээрим Таалайбекова билдиргендей, 2025-жылы Аксакалдар сотунун курамы Нарын шаардык мэриясы тарабынан бекитилген. Учурда бул курамда эл оозуна алынган, оозунда сөзү бар, кадыр-барктуу жарандар иш жүргүзүшүүдө.
