Бүгүн, 2025-жылдын 19-июнунда, Аксы райондук сотунда мыйзамдарды колдонуу боюнча аксакалдар сотторуна усулдук жардам көрсөтүүгө багытталган кеңешме болуп өттү.
Иш-чараны Аксы райондук сотунун төрагасы Азат Доулбеков ачты. Жыйынга аксакалдар сотторунун төрагалары жана айыл өкмөттөрүнүн өкүлдөрү катышышты.
Кеңешменин жүрүшүндө Аксы райондук сотунун судьясы Тариел Акылбеков катышуучуларды 2024-жылы кабыл алынган Кыргыз Республикасынын “Аксакалдар соттору жөнүндө” жаңы Мыйзамынын негизги жоболору менен тааныштырды.
Катышуучулар аксакалдар сотторунун укуктары жана милдеттери, алардын түзүлүшү жана ишин уюштуруу тартиби, иштерди кароо, чечим кабыл алуу жана анын аткарылышы, ошондой эле аксакалдар сотторунун ишмердүүлүгүн материалдык-техникалык жактан камсыздоо маселелерин талкуулашты.
Иш-чаранын алкагында судьялар практикалык кеңештер менен бөлүшүп, конкреттүү мисалдар аркылуу мыйзамдар боюнча катышуучуларга кеңири түшүндүрмөлөрдү беришти.
Кеңешменин соңунда катышуучулар көрсөтүлгөн усулдук жардамдын алар үчүн чоң мааниге ээ экенин белгилеп, Аксы райондук сотуна ыраазычылык билдиришти жана мындай жыйындарды үзгүлтүксүз өткөрүп турууну сунушташты.
