Баткен райондук соту «Баткен Ыйман» мектеп комплексинин бүтүрүүчүлөрү үчүн Ачык эшик күнүн өткөрдү. Иш-чаранын алкагында окуучулар алгач ирет сот системасынын ишмердүүлүгү менен жакындан таанышып, судьялар менен баарлашып, юридикалык кесиптер жөнүндө кеңири маалымат алышты.

Окуучулардын көпчүлүгү үчүн бул чыныгы ачылыш болду: алар сот системасынын ишин окуу китептери аркылуу эмес, түздөн-түз практика жүзүндө көрө алышты.

Соттун төрагасы Дүйшөнкул Шатманов окуучулар менен мотивациялык жолугушуу өткөрүп, мыйзамдын мааниси жана юристтердин коомдогу ролу жөнүндө айтып берди.

Судьянын жардамчысы Ильяс Урустамов соттун түзүмү, кызматкерлердин милдеттери жана сот жараянынын этаптары тууралуу кеңири маалымат берип, окуучуларга түшүндүрүү иштерин жүргүздү. Мектеп комплексинин бүтүрүүчүлөрү кызыгуу менен суроолорду берип, активдүү катышышты.

Баткен райондук сотунун бул демилгеси жаштар арасында укуктук маданиятты жогорулатууга жана сот системасы менен коом ортосунда ачык диалог түзүүгө багытталган.

Баткен облустук сотунун басма сөз катчысы Замирбек Ормонов