2025-жылдын 2-октябрында Кыргыз Республикасынын Жогорку Сотунда Жогорку Соттун судьясы Эльмира Байтикова ЕККУнун Демократиялык институттар жана адам укуктары боюнча бюросунун (БДИПЧ) делегациясы менен жолугушту.

Кыргыз Республикасынын Жогорку Кеңеши өзүн-өзү таркатуусуна жана алдыдагы шайлоолорго байланыштуу өлкөдө БДИПЧтин муктаждыктарды баалоо боюнча Миссиясы иштеп жатат. Анын курамына Лусине Бадалян жана БДИПЧтин шайлоо маселелери боюнча улук кеңешчиси Елена Ковалева кирет. Миссиянын максаты – шайлоого чейинки жагдайды жана даярдык иш-чараларын баалоо жана талдоо болуп саналат.

Жолугушууга Бишкек шаарынын Административдик сотунун төрагасы Азис Эшалиев, ошондой эле аталган соттун судьялары Акылбек Досалиев жана Эрмек Иманалиев катышышты.

Жолугушууда тараптар шайлоого байланышкан талаш-тартыштар боюнча иштердин категорияларын, алардын кароо тартибин, даттануу жол-жоболорун жана мөөнөттөрүн талкуулашты.