Бүгүн, 2025-жылдын  24-январында, Кыргыз Республикасынын Жогорку сотунун төрагасы Медербек Сатыев Чүй облусуна болгон иш сапардын алкагында Сокулук райондук сотунда болду.

Төрага элдин сотторго көз карашы салкын болуп жаткандыгын айтып, сот актылары тараптарга өз убагында берилбей жаткандыгын айтты.

Сотко келген тараптарга орой мамиле жасалып, өз учурунда көчүрмөлөрү берилбей жаткандыгын сынга алды.

“ Мамлекет башчысы тарабынан сотторго жетишээрлик көңүл бурулуп жатат. Соттордон бир гана адилеттүүлүк талап кылынып жатат. Бирок, соттордон кайтарым болбой жатат. Тескерисинче кармалып жатышат”,-  деди Медербек Сатыев.

Сокулук райондук сотунун төрагасы  Абдуразак Боромбаев  учурда аталган райондук сотто 11 судья эмгектенип, ар бир  цивилист судьяга 100дөн  ашык иштерди кароо туура келип жаткандыгын айтты.

Медербек Сатыев аталган райондук соттун архивине кызыгып, иштер электрондук архивке өтө электигине нааразы болду.

“ Каралган иштер  электрондук архивке өтүшү керек эле. Силер болсо топтоп отурасыздар.  Электрондук архивке өткөрүү тапшырмасы  2021-жылы эле берилген. Андыктан, тез арада элетрондук архивке өткөрүшүңөр керек”, — деп белгиледи Медербек Сатыев.