2025-жылдын 18-декабрында Ош шаардык сотунда «Экстремисттик материалдарды даярдоо, таратууга байланышкан кылмыш иштери боюнча соттук тажрыйбаны карап чыгуу» темасында тегерек стол болуп өттү.
Иш-чарага Ош облустук жана Ош шаардык сотторунун судьялары, Ош облустук жана Ош шаардык прокуратураларынын өкүлдөрү, Кыргыз Республикасынын УКМКнын Ош облусу жана Ош шаары боюнча Башкы башкармалыгынын өкүлдөрү, эксперттер, адвокаттар, ошондой эле Ош шаардык ички иштер башкармалыгынын Сулайман-Тоо жана Ак-Буура милиция бөлүмдөрүнүн тергөөчүлөрү катышты.
Тегерек столду Ош шаардык сотунун төрагасы Чолпон Асанова ачып, көтөрүлүп жаткан маселелер Ош шаарынын аймагында өзгөчө актуалдуу экенин белгиледи.
Ал эми Ош шаардык сотунун судьясы Жаныбек Жумаков өз баяндамасында Ош шаардык соту тарабынан алдын ала жүргүзүлгөн талдоонун жыйынтыктарын тааныштырды. Анын маалыматына ылайык, экстремисттик материалдарды даярдоо жана таратууга байланышкан кылмыш иштеринин дээрлик 60 пайызы Ош облусунда катталып, алардын олуттуу бөлүгү Ош шаардык сотунда каралган.
Тегерек столдун жыйынтыгында укук коргоо органдары тарабынан сапаттуу тергөө амалдарын жүргүзүү, прокуратура органдарынын көзөмөлүн күчөтүү жана кылмыштарды алдын алуу боюнча профилактикалык иш-чараларды жакшыртуу зарылдыгы белгиленди.
