2026-жылдын 5-6-майында Өзбекстандын борбор калаасында «Түрк мамлекеттериндеги соттук-укуктук билим берүү жана сот адилеттигин жүзөгө ашыруу: санариптик трансформация жана алдыңкы тажрыйбаны интеграциялоо» аттуу эл аралык форум жыйынтыкталды. Өзбекстан Республикасынын Сот адилеттиги академиясы тарабынан уюштурулган бул масштабдуу иш-чарага Кыргызстан, Өзбекстан, Азербайджан, Казакстан жана Туркия өлкөлөрүнүн өкүлдөрү катышты.
Форумдун ишине Кыргыз Республикасынын атынан Кыргыз Республикасынын Жогорку сотунун Аппаратынын Маалыматтык технологиялар бөлүмүнүн башчысы Адилет Мамырбаев жана Кыргыз Республикасынын Жогорку сотуна караштуу Сот адилеттигинин жогорку мектебинин Квалификацияны жогорулатуу бөлүмүнүн башкы адиси Жылдыз Акматбекова катышты.
Жогорку деңгээлдеги иш-чарага кыргыз өкүлдөрүнүн катышуусу биздин өлкө укук талаасында терең модернизациялоого багыт алгандыгын көрсөтөт. Форум интенсивдүү тажрыйба алмашуу үчүн негизги платформа болуп калды.
Иш чаранын жүрүшүндө катышуучулар судьялык кадрларды даярдоо процессине эл аралык стандарттарды киргизүүнү жана мыкты дүйнөлүк тажрыйбаларды улуттук укуктук системалардын муктаждыктарына ылайыкташтырууну талкуулашты.
Адилет Мамырбаев «Кыргыз Республикасынын сот системасын санариптик трансформациялоо» деген темада баяндама жасады.
Анда сот ишинин ачык-айкындуулугун жана жеткиликтүүлүгүн камсыз кылууга багытталган «Электрондук сот адилеттигине» өтүүгө өзгөчө көңүл бурулду.
Инновациялык ыкмаларды, анын ичинде жасалма интеллекттин элементтерин жана иш кагаздарын жүргүзүүнүн автоматташтырылган системасын киргизүү сот адилеттигин ишке ашырууну кыйла тездетүүгө жөндөмдүү өнүгүүнүн артыкчылыктуу багыты катары каралып, практикалык көндүмдөрдүн алкагында катышуучулар укук коргоо жана сот органдарынын кызматкерлерин окутууга бирдиктүү ыкмаларды иштеп чыгуу мүмкүнчүлүгү каралды. Түрк тилдүү мамлекеттердин тыгыз кызматташтыгы заманбап чакырыктарга ыкчам жооп берүүгө жана туруктуу укуктук чөйрөнү калыптандырууга мүмкүндүк берээри баса белгиленди.
Форум мамлекеттер аралык мамилелерди өнүктүрүүнүн жаңы этабы, биргелешкен билим берүү программаларын ишке ашыруу жана эксперттик билимдерди алмашуунун туруктуу каналдарын түзүү үчүн укуктук негизи болду.
Кыргызстандын сот системасы үчүн бул алдыңкы стандарттарды киргизүү жана эл аралык аренада өлкөнүн аброюн бекемдөө боюнча кошумча мүмкүнчүлүктөрдү ачат.
