2025-жылдын апрель айында Кыргыз Республикасынын жергиликтүү жана жогорку сотторунун бир катар судьялары Кытай Эл Республикасынын Соода министрлигинин колдоосу менен Шаньдун тышкы соода кесиптик колледжи тарабынан уюштурулган эки апталык эл аралык окуу семинарына катышышты.

Окуу программасы Кытайдын укуктук системасынын негиздери менен таанышуу максатында өткөрүлдү. Катышуучуларга Кытай Республикасынын Жарандык кодексинин негизги жоболору, кылмыш жана административдик сот өндүрүшүнүн өзгөчөлүктөрү, чет элдик инвестициялар жаатындагы мыйзамдар, эл аралык коммерциялык талаш-тартыштарды чечүү механизмдери, ошондой эле чек  аралык сооданы укуктук жактан коргоо жана санарип коопсуздукту камсыздоо маселелери талкууланды.

Семинар практикалык багытта өтүп, аудиториялык сабактар, талкуу сессиялары жана прецеденттерди талдоо менен катар Циндао, Хайкоу жана Ханчжоу шаарларындагы сот жана укуктук мекемелерге таанышуу сапарлары уюштурулду. Судьялар Эл аралык коммерциялык сотту, юридикалык компанияларды, коомдук укуктук кызмат көрсөтүү борборлорун жана башка профилдик мекемелерде болушту.

Бул эл аралык окуу семинары Кыргыз Республикасы менен Кытай Эл Республикасынын сот системаларынын ортосундагы кызматташууну бекемдөөгө салым кошуп, сот системасын уюштуруу жана иштетүү боюнча алдыңкы тажрыйбаларды үйрөнүүгө мүмкүндүк берди.