Нарын облустук сотунда бир катар судьяларга жана аппарат кызматкерлерине жарандардын кызыкчылыктарын жана мыйзамдуу укуктарын коргоого жана Кыргыз Республикасынын сот системасын өнүктүрүүгө кошкон өзгөчө салымдары үчүн сыйлыктар тапшырылды.

Нарын облустук сотунун төрагасы Куралбек Абдыкадыров иш-чарада Нарын облустук сот тутумунун судьялары ар бир ишти мыйзам чегинде карап, өздөрүнүн кызматтык функцияларын татыктуу аткарып жатышканын белгиледи.

Жыйында Кыргыз Республикасынын Президентинин Нарын облусундагы ыйгарым укуктуу өкүлү Алтынбек Эргешов, Нарын облусунун прокурору Абдирашит Кубатидинов, УКМКнын Нарын облусундагы башкармалыгынын башчысы Кубанычбек Атажанов, Нарын облустук ички иштер башкармалыгынын башчысы, милициянын полковниги Жолболду Кочконов, “Нарын-бажы” кызматынын башчысы Нурбек Алимов сот кызматкерлерин кесиптик күнү менен куттуктап, каалоо-тилектерин билдиришти.

Облус башчысы Нарын облустук сотунун төрагасы Куралбек Абдыкадыровго Турдакун Усубалиев атындагы төш белгисин, Нарын облустук сот департаментинин башчысы Адилет Чакиевге «Нарын даңкы» төш белгисин, Нарын облустук сотунун судьясы Эркинбек Дүйшеевке Кыргыз Республикасынын Президентинин Нарын облусундагы ыйгарым укуктуу өкүлүнүн Ардак грамотасын тапшырды.

Ошондой эле, Нарын облустук сотунун төрагасынын кылмыш иштери жана укук бузуулар жөнүндө иштер боюнча орун басары Келдибек Исажанов “Кыргыз Республикасынын прокуратурасына 100 жыл” медалы, Нарын райондук сотунун төрагасы Мунарбек Турдумбетов Нарын облустук прокуратурасынын Алкыш баракчасы менен сыйланышты.

Өз кезегинде, сот аппаратынын бир катар кызматкерлерине Кыргыз Республикасынын Жогорку сотуна караштуу сот департаментинин Ардак грамоталары жана сыйлыктары тапшырылды.

Нарын облустук сотунун басма сөз катчысы Гулзада Турдалиева