Талас облустук сотунда Кыргыз Республикасынын Жогорку сотунун төрагасы Медербек Сатыевдин буйругуна ылайык сот тутуму үчүн “Улуттук дем – дүйнөлүк бийиктик” уңгужолун ишке ашыруу боюнча 2025–2028-жылдарга карата иш-пландын алкагында жыйын өткөрүлдү.

“Ынтымактуу коом – улуттук баалуулук” урааны алдында өткөн иш-чарага соттун төрагасы жана судьялары, медиаторлор, аксакалдар сотторунун өкүлдөрү, ички иштер органдары жана жергиликтүү бийлик өкүлдөрү катышты.

Жыйында үй-бүлөлүк зомбулуктун алдын алуу, жарандардын сотко кайрылуусундагы тартип, ошондой эле аксакалдар сотторунун ишмердүүлүгүндөгү көйгөйлүү маселелер талкууланып, аларды биргеликте чечүү боюнча сунуштар айтылды. Талаш-тартыштарды сотко чейинки тартипте жөнгө салууда медиациянын ролу белгиленди.

Иш-чаранын жыйынтыгында сот, ички иштер органдары, медиаторлор жана аксакалдар соттору ортосунда тыгыз кызматташтыкты күчөтүү жана мындай жолугушууларды үзгүлтүксүз өткөрүү тууралуу макулдашылды.