Кыргыз Республикасынын сот системасы Конституциялык соттун жамаатына, Кыргыз Республикасынын Эмгек сиңирген юристи Латип Пазылович Жумабаевдин үй-бүлөсүнө, туугандарына жана жакындарына анын мезгилсиз дүйнөдөн кайткандыгына байланыштуу терең кайгыруу менен көңүл айтат.

Жогорку соттун жана жергиликтүү соттордун судьялары, аппарат кызматкерлери бул оор жоготууда кесиптештеринин жана маркумдун жакындарынын азасын тең бөлүшөт. Бул жоготуу — өлкөнүн сот системасы жана жалпы юридикалык коомчулук үчүн орду толгус кайгы.

Латип Пазылович Жумабаев 1956-жылдын 10-июнунда Ош облусунун Өзгөн районундагы Кароол айылында төрөлгөн. 1985-жылы Кыргыз мамлекеттик университетинин юридика факультетин аяктаган. Ал 2000–2017-жылдары прокуратура органдарында ар кыл кызматтарда иштеген.

2019–2020-жылдары Кыргыз Республикасынын Президентинин жарлыгы менен Конституциялык палатадагы туруктуу өкүлдүн милдетин аткарып турган. 2020-жылдын 26-февралында Кыргыз Республикасынын Жогорку Кеңешинин токтому менен Конституциялык соттун судьясы болуп шайланган.

Узак жылдар бою мыйзамдуулукка кызмат өтөп, элдин ишенимине ээ болгон Латип Пазылович Кыргыз Республикасынын Эмгек сиңирген юристи ардактуу наамына татыктуу болуп, Конституциялык палатанын II даражадагы медалы жана башка бир катар ведомстволук сыйлыктар менен сыйланган.

Латип Пазылович Жумабаев принципиалдуу, кесибин мыкты билген, ак ниет жана адамкерчилиги жогору инсан катары эсте калат.