Манас шаарынын Сот адилеттик үйүндө Жалал-Абад облустук жана Манас шаардык сотторунун демилгеси менен административдик-аймактык реформанын алкагында жарандардын жер тилкелерине болгон укуктарын тариздөөдө жаралып жаткан көйгөйлөрдү чечүүгө багытталган тегерек стол өткөрүлдү.
Иш-чарага облустук, шаардык жана райондук соттордун судьялары, Манас шаардык мэриясынын жана Сузак райондук мамлекеттик администрациясынын өкүлдөрү, Жер ресурстары, кадастр жана архив кызматкерлери катышты.
Талкуунун жүрүшүндө судьялар жана катышуучулар жер участокторуна байланыштуу маселелердин басымдуу бөлүгү жергиликтүү өз алдынча башкаруу органдары тарабынан өз убагында жана талапка ылайык аткарылбаган милдеттерден улам келип чыгып жатканын белгилешти. Айрыкча мурда кабыл алынган токтомдордо кетирилген кемчиликтерди жоюу, документтерди тактоо жана жарандардын кайрылууларын сотко жеткирбей чечүү маселелерине жетиштүү көңүл бурулбай жатканы айтылды.
Тегерек столдун негизги максаты — карапайым жарандардын жерге байланышкан көйгөйлөрүн жеңилдетүү, сотко чейинки тартипти сактоону камсыз кылуу жана Манас шаардык мэриясынын кызматкерлерин мыйзамда каралган милдеттерин так, өз убагында жана жоопкерчиликтүү аткарууга чакыруу болду.
Иш-чаранын жыйынтыгында жер маселелерин чечүүдө мыйзам талаптарын сактоо, жарандардын укуктарын коргоону биринчи орунга коюу жана мамлекеттик органдардын жоопкерчилигин жогорулатуу зарылдыгы баса белгиленди.
