Аталган жыйынга “Элдик Банк” ААКнын, “Айыл Банк” ААКнын, “Компаньон Банк” ЖАКнын, “ФИНКА Банк” ЖАКнын, МФК “Салым Финанс” ЖАКнын, “Аманат Кредит” ЖЧКсынын, МКК “М Булак” жана МФК “Байлык Финанс” мекемелеринин Кочкор филиалдарынын өкүлдөрү катышты.

Иш-чаранын жүрүшүндө банктар жана финансылык мекемелер тарабынан сотко берилүүчү доо арыздардагы кемчиликтерди жоюу, документтерди мыйзам талаптарына ылайык тариздөө, ошондой эле соттук териштирүүнүн катышуучуларына АИС сот системасы аркылуу SMS-билдирүүлөр менен кабарлоо тартиби талкууланды.

Жыйынга төрагалык кылган Кочкор райондук сотунун төрагасы Өмүрбек Сарыбаев доо арыздарга тиркелген келишимдер мамлекеттик тилде же эки тилде берилүүсү Кыргыз Республикасынын Жарандык-процесстик кодексинин талаптарына ылайык келерин белгиледи.

Анын айтымында, мындай тартип жарандардын келишимдерди толук түшүнүүсүнө шарт түзүп, сот иштеринин ыкчам жана натыйжалуу каралышына көмөк көрсөтөт.

Ошондой эле жыйындын жүрүшүндө соттук отурумдар боюнча билдирүүлөрдү АИС сот системасы аркылуу SMS түрүндө жөнөтүү пилоттук режимде ишке киргизилгени маалымдалды. Катышуучуларга жарандардын телефон номерлерин жана электрондук почта даректерин так көрсөтүү зарылдыгы түшүндүрүлдү.

Жыйын суроо-жооп форматында өтүп, катышуучулар өздөрүн кызыктырган суроолоруна жооп алышты.