Бүгүн, 2025-жылдын 23-апрелинде, Кыргыз Республикасынын Жогорку сотунун төрагасынын орун басары Нургуль Бакированын катышуусунда «Мамлекеттик алымды онлайн төлөө» системасынын пилоттук режимде ишке кириши боюнча презентация болуп өттү.
Иш-чараны Жогорку соттун судьясы Инара Гилязетдинова башында турган жумушчу топтун өкүлдөрү өткөрүштү. Ага судьялар, Жогорку соттун Аппаратынын маалыматтык технологиялар бөлүмүнүн башчысы Алис Ибраимов, “Адилет сот” маалыматтык технологиялар мекемесинин директору Бек Иманалиев, ошондой эле жергиликтүү соттордун канцелярия башчылары видеоконференц байланыш аркылуу катышышты.
Сот системасы тарабынан ишке киргизилген жаңы санариптик сервис жарандарга мамлекеттик бажы төлөмүн үйдөн же кеңседен чыкпай эле, сотко же банкка жеке барбастан, өзүнө ыңгайлуу убакта мобилдик тиркемелер аркылуу төлөөгө мүмкүнчүлүк берет.
Сервис Жогорку соттун алдындагы Суд департаментинин «Адилет сот» маалыматтык технологиялар мекемеси тарабынан иштелип чыгып, Финансы министрлиги, мамлекеттик жана жеке банктар менен кызматташтыкта ишке ашырылып жатат.
Азыркы учурда система «Элдик» мобилдик тиркемеси менен иштеп жатат. Жакынкы күндөрү ага «МБанк», «Бакай Банк» жана башка банктар да кошулат.
Мындан тышкары, жарандардын ыңгайлуулугу үчүн Жогорку соттун sot.kg расмий сайтына мамлекеттик алымды эсептөөчү онлайн-калькулятор жайгаштырылган. Анын жардамы менен арыздын түрүнө жараша төлөнө турган алымдын көлөмүн алдын ала эсептеп алууга болот.
Эскерте кетсек, мамлекеттик алым — бул сотко кайрылууда, юридикалык мааниге ээ документтерди алууда же башка юридикалык аракеттерди жасоодо төлөнүүчү милдеттүү төлөм. Аны жеке адамдар да, юридикалык жактар да төлөшөт.
