Панфилов жана Аламүдүн райондук сотторунда сот жетекчилигинин жана ички иштер органдарынын өкүлдөрүнүн катышуусунда жумушчу жолугушуулар өттү. Иш-чаралардын негизги темасы коррупцияга каршы күрөшүү боюнча мамлекеттик стратегияны ишке ашыруу болду.

Панфилов райондук сотунун төрайымы Гүлмира Саргалдакованын төрагалыгы алдында өткөн кеңешме сотко чейинки өндүрүш учурундагы коррупциялык тобокелдиктердин алдын алууга багытталды. Талкууга Панфилов райондук ички иштер бөлүмүнүн башчысынын сотко чейинки өндүрүш боюнча орун басары Эркин Андашев жана тергөө курамы катышты.

Сот төрайымы тергөө учурунда мыйзамдын талаптарын так сактоо коррупциялык механизмдерди жоюунун негизи болуп саналарын баса белгиледи.

Ушундай эле форматтагы тегерек стол Аламүдүн райондук сотунун төрагасы Самат Шералиев тарабынан жергиликтүү РИИБдин кызматкерлери менен биргеликте өткөрүлдү. Катышуучулар «адамдык фактордун» таасирин азайтуу боюнча практикалык чараларга токтолушту.

«Сот адилеттигинин ачыктыгын жана калыстыгын камсыз кылуу — мамлекеттик саясаттын артыкчылыктуу багыты, ал эми коррупция менен күрөшүү — биздин жалпы милдетибиз», — деп белгиледи Самат Шералиев.

Эки райондо өткөн иш-чаралардын жыйынтыгы боюнча биргелешкен ишти өркүндөтүү боюнча сунуштамалар иштелип чыкты. Катышуучулар мындай жолугушууларды үзгүлтүксүз өткөрүп туруу зарыл деген бирдиктүү пикирге келишти.