Таш-Көмүр шаардык сотунда «Манас угуунун декадасы» өткөрүлдү. Аталган иш-чарага шаардык сотунун судьялары, аппарат кызматкерлери, Б.Осмонов атындагы Таш-Көмүр институтунун филология жана педагогика илимдеринин кандидаты Жаракул Эшиев, Б.Осмонов атындагы Таш-Көмүр институтунун мамлекеттик тил социалдык жана тарбиялык иштер боюнча директордун орун басары филология илиминин кандидаты Гүлнуркан Курманалиева, Б.Осмонов атындагы Таш-Көмүр институтунун мугалими Бегалы Ооганбеков жана институттун студенттери катышышты.
Иш-чараны шаардык сотунун төрагасы Арстанбек Аскарбеков ачып, катышуучуларды уңгужолдун максаты менен тааныштырып, окуу жайынан келген конокторду тааныштырып, аларга сөз берди.
Жаракул Эшиев “Манас” эпосунун баалуулугу жөнүндө лекцияны окуп, анда “Манас” эпосундагы адилеттүүлүктү, акыйкаттыкты, чынчылдыкты камтыган учурларын баса белгилеп, Манас-байыркы кыргыз рухунун туу чокусу, кылымдарды карыткан тарыхынын алтын казынасы, укумдан-тукумга өтүп келе жаткан улуу мурасы, улуттук сыймыгы экендигин терең түшүндүрүп өттү.
Гүлнуркан Курманалиева өз сөзүндө, “Манас” эпосу кыргыз элинин баа жеткиз байлыгы, улуу мурасы экендигин ар бир жарандын жүрөгүнө жеткирип, алардын жүрөгүндөгү патриоттук сезимдерин ойготуп, улуттук мурастарды сактоо жана урматтоого үндөп келерин белгилеп өттү.
Өз кезегинде, Б.Осмонов атындагы Таш-Көмүр институтунун студенттери хор түрүндө “Манас” эпосунан үзүндүлөрдү айтып өтүштү. Ал эми Бегалы Ооганбеков Манас айтууну улантты.
Иш чаранын соңунда, Арстанбек Аскарбеков иш-чараны жыйынтыктап, келген конокторго Таш-Көмүр шаардык сотунун жалпы кызматкерлеринин атынан ыраазычылык билдирди.
