2026-жылдын 2-апрелинде Кыргыз Республикасынын Жогорку сотунда сот тутумун санариптештирүү жана Укук бузуулардын бирдиктүү реестри менен интеграциялоо маселелери боюнча жумушчу кеңешме өткөрүлдү.
Кеңешмеге Укук бузуулардын бирдиктүү реестринин ээси болгон Кыргыз Республикасынын Ички иштер министрлигинин өкүлдөрү, «СУД 3.0» автоматташтырылган маалыматтык системасын ишке ашырууга катышып жаткан сот тутумунун өкүлдөрү, ошондой эле «Түндүк» ААКнын, Башкы прокуратуранын, «Укук» жана «Кызмат» мамлекеттик мекемелеринин өкүлдөрү катышты.
Талкуунун жүрүшүндө тараптар Укук бузуулардын бирдиктүү реестри менен «СУД 3.0» автоматташтырылган маалыматтык системасынын ортосунда интеграциялык өз ара аракеттенүүнү жолго коюунун зарылдыгы тууралуу бирдиктүү пикирге келишти.
Негизги талап катары Укук бузуулардын бирдиктүү реестринен «СУД 3.0» системасына укук бузуулар боюнча иштер боюнча толук санариптик материалдарды өткөрүп берүү белгиленди. Бул материалдарга соттук кароого керектүү бардык процессуалдык мааниге ээ документтер жана маалыматтар кирип, кагаз түрүндө кайталоосуз колдонулушу каралууда.
Ошондой эле иштерди сотко келип түшкөн учурдан тартып соттук чечим чыгарылганга чейин үзгүлтүксүз электрондук коштоону камсыз кылууга өзгөчө көңүл бурулду. Бул иштин үзгүлтүксүз жүрүшүн камсыздап, санариптик сот өндүрүшүнүн логикасына жооп берет.
Белгиленгендей, интеграцияны ишке ашыруу иштерди кароонун ыкчамдыгын жогорулатууга, кагаз жүгүртүүнү кыскартууга, материалдардын жоголуу же бурмалануу тобокелдиктерин азайтууга, ошондой эле соттук процесстердин ачыктыгын жана көзөмөлдөнүшүн камсыз кылууга мүмкүндүк берет.
Мындан тышкары, интеграция маселелерин мүмкүн болушунча кыска мөөнөттө, айрыкча техникалык жагынан, анын ичинде өткөрүлүүчү маалыматтардын курамын жана түзүмүн аныктоо, форматтарды жана системалар аралык өз ара аракеттенүү протоколдорун белгилөө, электрондук документтердин юридикалык маанисин камсыз кылуу, ошондой эле маалыматтарды берүүдө туруктуулук жана коопсуздукту камсыз кылуу зарылдыгы баса белгиленди.
Интеграция Кыргыз Республикасынын электрондук башкаруу жана ведомстволор аралык өз ара аракеттенүү чөйрөсүндөгү мыйзам талаптарын эске алуу менен, тиешелүү инфраструктураны колдонуу аркылуу жүргүзүлүшү керектиги айтылды.
Жыйынтыгында тараптар ведомстволор аралык кызматташууну улантууга жана сот тутумун санариптик трансформациялоонун алкагында интеграцияны этап-этабы менен ишке ашыруу үчүн техникалык жана уюштуруучулук чечимдерди ыкчам иштеп чыгууга даяр экендиктерин билдиришти.
