Бүгүн, 18-октябрда  Кыргыз Республикасынын Жогорку сотуна караштуу Сот адилеттигинин жогорку мектебинин окуу залында  2019-жылдын 9-сентябрынан 18-октябрына чейин  Кыргыз Республикасынын биринчи инстанциянын жергиликтүү сотторуна биринчи жолу дайындалган судьяларды комплекстүү окутуу программасы боюнча квалификациясын жогорулатуу курсунан өтүшкөн 13 угуучу үчүн  модулдук тестирлөө өткөрүлдү. Кыргыз Республикасынын  судьяларынын жана сот тутумундагы кызматкерлердин  квалификациясын жогорулатуу жөнүндө Жобого ылайык,  квалификациясын жогорулатуу окуу программасы боюнча окутуунун жыйынтыгынын негизинде тестирлөө жүргүзүлөт. Баса белгилей кетчү нерсе, тестирлөө Сот адилеттигинин жогорку мектебинин туруктуу өнөктөшү – Европа биримдигинин  “Кыргыз Республикасында укук үстөмдүүлүгү – 2-фаза”  Долбоору ушул жылдын 1-октябрында  берген жаңы ноутбуктарын  колдонуу менен жаңы окуу залында  өткөрүлдү. Белгилүү болгондой, угуучуларды окутуу программасы 6 жуманы түздү, анын ичинен  5 жума теоретикалык  окутуу бөлүгүн камтып, 1 жума Кыргыз Республикасынын жергиликтүү сотторунда стажировкадан өтүштү. “Кыргыз Республикасынын  судьяларынын статусу жөнүндө” Кыргыз Республикасынын конституциялык Мыйзамдарына ылайык,  судья квалификациясын жогорулатууга милдеттүү.  Судьялардын квалификациясын жогорулатуу үч жылда бир жолудан кем эмес,  ошол мезгилге эмгек акысын сактоо менен окуу программаларга ылайык жүзөгө ашырылат. Судьялардын квалификациясын жогорулатуунун  негизги максаты —  кесиптик билим деңгээлин жогорулатуу,  эл аралык жана улуттук укукта,  сот практикасында  актуалдуу өзгөрүүлөрдү өздөштүрүү, судьялардын квалификациясына карата коюлган  жогорку талаптарга жана кесиптик тапшырмаларды  чечүүнүн заманбап ыкмаларын өздөштүрүү зарылдыгына байланыштуу  теориялык билимин жана практикалык көндүмдөрүн жаңыртуу. Окуудан өткөн жана модулдук тестирлөөнү ийгиликтүү тапшырган угуучуларга  сертификаттар тапшырылат.  

2019-жылдын 17 –октябрында Кыргыз Республикасынын Жогорку сотунун төрайымынын орун басары Каныбек Бокоев жана Жогорку соттун судьясы Кыдык Джунушпаев Баткен облусунун  жергиликтүү  сотторунда болуп, практикалык жардамдарын көрсөтүштү. Алар үстүбүздөгү жылдын 9 айынын ичинде облустун  жергиликтүү соттору тарабынан каралган жазык иштери менен жакындан таанышып чыгышты. Баткен облустук  сотунда жергиликтүү соттор менен жыйын өткөрүлүп, 2019-жылдын 1-январынан тартып күчүнө кирген кодекстер жана мыйзамдар, жергиликтүү сотторду санариптештирүү, практикалык жардам көрсөтүү жана анын ичинде соттордун автоматташтырылган маалыматтык системасы  жана иштерди автоматтык бөлүштүрүү системаларын киргизүү боюнча  талкуу болду. Жыйындын жүрүшүндө жергиликтүү соттордун судьялары Жогорку соттун судьяларына практикада пайда болгон суроолорун беришип, кеңири жоопторду алышты. Жыйындын соңунда Каныбек Бокоев  судьяларды мыйзамдын чегинде адилеттүү иш  алып барууга  чакырды.

Бүгүн, 2019-жылдын 18-октябрында Кыргыз Республикасынын Жогорку сотунун төрайымынын  орун басары  Каныбек Бокоев атайын иш сапары менен Ош облусунда болуп, жергиликтүү соттордун  ишмердүүлүгү менен таанышты. Иш чарага Жогорку соттун жазык иштери жана административдик укук бузуулар жөнүндөгү иштер боюнча соттук коллегиясынын судьясы Кеңешбек Токтомамбетов, Ош облусундагы жергиликтүү соттордун төрагалары жана  судьялары катышышты. Иш сапардын   жүрүшүндө  К.Бокоев Ош облусунун  жергиликтүү соттору тарабынан кабыл алынган соттук актылар менен таанышып чыгып, соттордун аудио жана видео жазуу каражаттары менен камсыздалуусу, аларды колдонуу, соттун автоматташтырылган маалымат системасынын иштеши менен таанышты. Жыйындын жүрүшүндө сот адилеттүүлүгүн аткаруунун сапатын жогорулатууга жана  соттор тарабынан бирдей тажрыйбанын колдонулуусуна басым жасалышы керектиги белгиленди. Мындан тышкары К.Бокоев терроризм жана экстремизмге байланышкан кылмыштарды кароодо өтө кылдаттык менен соттук териштирүүлөрдү жүргүзүлүү зарыл экендигин эскертти. Жыйындын соңунда учурда ишке ашырылып жаткан  сот реформасына мамлекет башчысы тарабынан катуу көзөмөл жүргүзүлүп жаткандыгын айтып, мунун  алкагында коюлган талаптар толук аткарылуусу керектигин белгиледи.  

Бүгүн, 2019-жылдын 18-октябрында  Кыргыз Республикасынын Жогорку сотунда Кыргыз мамлекеттик юридикалык университетинин  студенттери менен жолугушуу болду. Жолугушууга Кыргыз Республикасынын Жогорку сотунун төрайымынын орун басары Нургуль Асанова жана жарандык иштер боюнча соттук коллегиясынын судьясы Нургуль Сатыбалдиева катышышты. Жолугушуу “Эрте нике куруунун көйгөйлөрү, балдар менен аялдардын укуктары, алименттер” деген  темада өттү. Жогорку соттун төрайымынын орун басары Нургуль Асанова Юридикалык университеттин студенттерине  республика боюнча үй-бүлөөлүк маселелерге  байланыштуу сотто каралган талаш — тартыштар тууралуу  жалпылап айтып берди. Жарандык иштер боюнча соттук коллегиясынын судьясы Нургуль Сатыбалдиева эрте турмуш куруу, аялдар менен балдардын укуктары, алимент маселелерине кеңири токтолуп,  жарандардын укуктары менен милдеттери  тууралуу маалымат берип, студенттердин  суроолоруна жооп берди. Бул иш чара жаштарга  бийликтин бир бутагы болгон сот тутумунун ишмердүүлүгү  тууралуу маалымат берип, студенттердин укуктук билимин жогорулатуу менен  жарандардын турмуш куруудагы жана ажырашуудагы жоопкерчиликтерине байланышкан маселелерди талкуулоо максатында уюштурулду.

Бүгүн, 2019-жылдын 15-октябрында, Бишкек шаарынын Биринчи май райондук сотунда Азиз Батукаевди  абактан мыйзамсыз  бошотуу боюнча алдын ала угуу соттук отуруму улантылды. Сот отуруму айыпталуучу А.Ш.Атамбаев тарабынан Кыргыз Республикасынын Жазык-процесстик кодексинин 275-беренесинин 4-бөлүгүнө ылайык, ишти анын катышуусу жок кароо боюнча  өтүнүч келип түшкөндүгүнө байланыштуу,  айыпталуучу А.Ш. Атамбаевдин катышуусуз өттү. 2019-жылдын 15-октябрында соттук отурумда  айыпталуучу А.Ш.Атамбаевдин кызыкчылыгын коргогон жактоочу С. Слесарев тарабынан айыпталуучу А.Ш. Атамбаевге карата бөгөт  коюу чарасын жокко чыгаруу, кылмыш ишин токтотуу, К.О. Качкыналиевдин кызыкчылыгын коргогон  жактоочу У.С. Караев тарабынан кылмыш ишиндеги материалдарды ачыкка чыгаруу жөнүндөгү өтүнүчтөр берилди. Мындан тышкары  К.О. Качкыналиевдин бөгөт коюу чарасын жокко чыгаруу жана кылмыш ишиндеги материалдарды ачыкка чыгаруу жөнүндө өтүнүчтөр келтирилди. Соттун токтому менен  жактоочулардын айыпталуучулар  Атамбаев жана Качкыналиевдин бөгөт коюу чарасын, кылмыш ишин токтотуу боюнча келтирилген  өтүнүчтөрү канааттандыруусуз калтырылды. Сот тарабынан  бул кылмыш иши боюнча кийинки соттук отурум  2019 — жылдын 16-октябрына саат 10:00го  белгиленди.  

2019-жылдын 10-октябрында Кыргыз Республикасынын Жогорку сотунун төрайымынын орун басары Каныбек Бокоев жана судьясы Болот Батыралиев Талас облусунун жергиликтүү сотторунда иш сапары менен болушуп, материалдык жана процессуалдык укуктун нормаларын колдонуу боюнча практикалык жардам көрсөтүштү. Ошондой эле, жергиликтүү соттордун 2018-жылдын биринчи жарым жылдыктагы жана 2019-жылдын 9 ай ичинде каралган жазык иштери жана  соттук материалдар менен таанышып чыгышты. Иш сапарынын алкагында, Талас облусунун жергиликтүү соттору менен чогулуш өткөрүлүп, 2019-жылдын 1-январынан тартып колдонууга киргизилген жаңы кодекстер менен мыйзамдардын практика жүзүндө колдонулушун, жергиликтүү сотторунун административдик имараттары боюнча жана сот түзүмүнүн кызматкерлеринин иштөө шарттары менен, жергиликтүү сотторду санариптештирүү, анын ичинде автоматташтырылган маалымат жана иштерди автоматташтырылган түрдө бөлүштүрүү системаларын киргизүү боюнча таанышып өтүштү. Мындан тышкары, сот адилеттигин жүзөгө ашырууда пайда болгон суроолор боюнча талкуулор болуп өттү. Чогулуштун жыйынтыгында Кыргыз Республикасынын Жогорку сотунун төрайымынын орун басары Каныбек Бокоев жана судьясы Болот Батыралиев иштерди кароодо мыйзамдуулукту бекем сактоо менен иш алып баруусуна чогулуштун катышуучуларын чакырды. Мындан тышкары, иштерди кароодо процессуалдык мөөнөттөрдү бекем сактоону, коррупциялык жана экономикалык кылмыш иштери боюнча иштерди жана ошондой эле жашы жетпегендердин кылмыш иштери боюнча жана жашы жетпеген өспүрүмдөрдүн зомбулукка учураган кылмыш иштери боюнча мыйзамдын негизинде кароосун талап кылып, коомчулуктун сот түзүмүнө ишеничин көтөрүү максат катары белгилеп өттү.

2019-жылдын 3-октябрында Бишкек шаарынын Биринчи май райондук сотунун өндүрүшүнө коррупцияга айыпталып жатышкан А.Ш.Атамбаев, И.Ы. Жолдубаева, А.Раимжанов жана К.О.Качкыналиевдердин кылмыш иши келип түшкөн. Соттун 2019-жылдын 7-октябрындагы токтому менен Кыргыз Республикасынын Жазык-процесстик кодексинин 270-беренесине ылайык бул иш боюнча алдын ала угуу күнү белгиленген (Кыргыз Республикасынын ЖПК 270-беренесине ылайык сот өзгөчө оор кылмыштар боюнча; бөгөт коюу чарасын өзгөртүү боюнча өтүнүчтөрдү кароого байланышкан маселелерди чечүү үчүн алдын ала угуу жүргүзөт жана  алдын ала угуу иш сотко келип түшкөн учурдан тартып 10 суткадан кечиктирилбестен жүргүзүлүүгө тийиш). Кыргыз Республикасынын Жазык-процесстик кодексинин 275-беренесине ылайык, алдын ала угуу тараптардын катышуусу менен жабык сот отурумунда судья тарабынан жүргүзүлөт. 2019-жылдын 11-октябрында өткөн алдын ала угуунун жүрүшүндө  айыпталуучу А.Ш. Атамбаев сот отурумуна келүүдөн баш тарткандыгынан улам сотко алынып келинбегендигине байланыштуу  алдын ала угуу 14-октябрь саат 14:00гө жылдырылган. Бүгүн, 14-октябрда, айыпталуучу А.Ш. Атамбаев сотко келүүдөн дагы  баш тарткандыктан, алдын ала угуу 15-октябрга жылдырылды.

Бүгүн,  2019-жылдын 11-октябрында, Кыргыз Республикасынын Жогорку сотунун төрайымы Гульбара Калиева жергиликтүү соттор менен видеоконференция өткөрдү. Видеоконференцияда төрайым   аудио жана видео жазуу боюнча маселени көтөрүп, жергиликтүү соттордун төрагаларынан  9 айдын жыйынтыгы боюнча  статистикалык отчёт тапшырууда канча сот процесси болуп, анын ичинен канчасы  аудио жана видео жазуудан өткөнүн көрсөтүүнү талап кылды. Мындан тышкары соттордун автоматташтырылган маалыматтык системасына канча иш катталганын дагы кылдат карап  чыгаарын айтып, буга өзгөчө көңүл бурууну тапшырды. Г.Калиева Сот адилеттигинин жогорку мектебинде сабактар  мамлекеттик тилде  өтүүсүнө басым жасалып жатканын айтып,  судьяларга  кыргыз тилинде лекцияларды өтө турган тренерлерди тандоо боюнча сынак жарыяланаарын белгиледи. Төрайым жергиликтүү соттор менен өткөн буга чейинки видеоконференцияда Судьялар ассоциациясын  жандандыруу боюнча маселе көтөргөн болчу. Бул боюнча жергиликтүү соттордун судьялары өз сунуш-пикирлерин айтышты. Видеоконференциянын жыйынтыгында Гульбара Калиева судьяларга  сот системасынын  ачык-айкындуулугун камсыздоо бүгүнкү күндүн  талабы экендигин  эскертти.

Кыргыз Республикасынын Жогорку сотунун төрайымынын орун басары Каныбек Бокоев жана Жогорку соттун судьясы Лепес Темирбеков Жалал-Абад областынын жергиликтүү  сотторунда болуп, практикалык жардамдарын көрсөтүштү. Алар үстүбүздөгү жылдын 9 айынын ичинде областтын жергиликтүү соттору тарабынан каралган жазык иштери менен жакындан таанышып чыгышты. Иш сапардын алкагында  Жалал-Абад областтык сотунда жергиликтүү соттор менен жыйын өткөрүлүп, 2019-жылдын 1-январынан тартып күчүнө кирген кодекстер жана мыйзамдар, жергиликтүү сотторду санариптештирүү, практикалык жардам көрсөтүү туурасында талкуу болду. Жыйындын жүрүшүндө жергиликтүү соттордун судьялары практикада пайда болгон суроолорун Жогорку соттун судьяларына беришип, мазмундуу жоопторун алышты. К.Бокоев Жалал-Абад областынын судьяларына  иштерди кылдаттык менен карап, белгиленген мөөнөтүн, процессуалдык нормаларды сактоого, коррупцияга жол бербөөгө, адам укуктарын коргоого, мыйзамдуулукту бекем сактоо менен иш алып баруусуна чакырып, иштерине ийгилик каалады.         Жалал-Абад областтык сотунун басма сөз катчысы  

Кызматтын аталышы: Кыргыз Республикасынын Жогорку сотуна караштуу Сот адилеттигинин жогорку мектебинин окутуучусу Бош кызмат орундардын саны — 3 штаттык бирдик. — 2 бирдик “Жазык укугу жана процесси” багыты боюнча; — 1 бирдик “Жазык укугу жана процесси” же “Жарандык укук жана процесси” багыттары боюнча мамлекеттик тилде окутуучулук иш тажрыйбасы менен. Жалпы квалификациялык талаптар:  Кесиптик билимдин деңгээли: — жогорку юридикалык билими; — юриспруденция багытында илимий даражасынын же сотторду жана сот тутумунун кызматкерлерин окутуу үчүн уюштурулган тренерлер үчүн тренинге/тренингдерге катышкандыгын тастыктаган сертификатынын болушу артыкчылыгы болуп саналат. Эмгек стажы жана тажрыйбасы: —   үч жылдан кем эмес окутуучулук иш тажрыйбасы, анын ичинде Сот адилеттигинин жогорку мектебинде; — окутуу модулдарын, окуу куралдарын жана методикалык материалдарды, тесттик суроолорду жана тапшырмаларды жазуу тажрыйбасы. Төмөнкүлөрдүн болушу артыкчылыгы болуп саналат: —   судьялык иш стажы; — окуу материалдарын Кыргыз Республикасынын мыйзамдарына ылайык экспертизадан өткөрүү тажрыйбасы; — окуу куралдарын жана модулдарын, методикалык материалдарды, окутуу пландарын, программаларын, тесттин суроолорун иштеп чыгуу же расмий тилден мамлекеттик тилге, мамлекеттик тилден расмий тилге которуу тажрыйбасы. Кесиптик компетенттүүлүгү: Төмөнкүлөрдү билүү: — жалпы мыйзамдарды, ошондой эле тиешелүү тармактагы мыйзамдарды; — сот системасын билүү; — кызматтык милдеттерин аткаруу үчүн зарыл болгон көлөмдө мамлекеттик жана расмий тилдерди; — чет тилдерди (артыкчылыгы болуп саналат).  Билгичтиги: — биринчи дайындалган судьяларды алгачкы даярдыктан өткөрүү, судьялардын жана сот тутумунун кызматкерлеринин квалификациясын жогорулатуу маселелерин чечүү боюнча ыкмаларды интеграциялоо жана анализдөө, прогноздоо, жалпылоо, мониторинг, контроль жүргүзүү; — аналитикалык, статистикалык, илимий-изилдөө жана билим берүү, ошондой эле басып чыгаруу иш-чараларын жүргүзүү; — окуу программаларын ишке ашыруу боюнча новатордук ыкмаларды колдонуу үчүн мүмкүнчүлүктөрдү издөө; — тартылган окутуучулар/адистер, Сот адилеттигинин жогорку мектебинин жетекчилиги жана түзүмдүк бөлүмдөрү менен иштерди өз ара натыйжалуу пландоо; — кызыкчылыктардын кагылышына алып келүүчү проблемалуу кырдаалдарды өз убагында көрө билүү жана чечүү. Көндүмдөр: — жогору турган органдардын, Сот адилеттигинин жогорку мектебинин жетекчилигинин стратегиялык максаттарын жана көз караштарын, буйруктарын жана тапшырмаларын өз учурунда жана сапаттуу ишке ашыруу, окутуучу курам/тартылган адистер менен өз ара аракеттенүү/башкаруу, иштин жаңы формаларын жана методдорун издөө; — соттордун жана сот тутумунун кызматкерлиринин квалификациясын жогорулатууда актуалдуу маселелер боюнча муктаждыктарын аныктоо жана анализдөө; — натыйжалуу өз ара мамилелерди түзүү, иштиктүү этикеттин ыкмаларын, кеңешмелерди, жолугушууларды өткөрүүнүн ыкмаларын билүү, элдин алдында сүйлөө; —  биринчи дайындалган судьяларды алгачкы даярдыктан өткөрүү, судьялардын жана сот тутумунун кызматкерлеринин квалификациясын жогорулатуу маселелери боюнча жакынкы жана алыскы чет өлкөдөгү мамлекеттик органдар, эл аралык жана коомдук уюмдар, сот органдары, билим берүү жана окутуу борборлору менен  (расмий жана мамлекеттик тилде, чет тилде артыкчылыгы болуп саналат)  ишкердик  кат алышуу; — окутуу программаларын жакшыртуу үчүн сунуштарды даярдоо максатында сот органдарынын практикалык иш-тажрыйбаларын изилдөө. Конкурска катышуу үчүн төмөнкү документтер талап кылынат: жеке арыз; кадрларды каттоо боюнча өздүк баракчасы сүрөтү менен; паспорттун көчүрмөсү (түп нускасы документтерди тапшыруу жана конкурска каттоо учурунда көрсөтүлөт); өмүр баяны, резюме; нотариустан күбөлөндүрүлгөн эмгек китепчесинин, билими, окумуштуулук даражасын жана окумуштуулук наамын ыйгаруу жөнүндөгү документтердин көчүрмөсү; квалификациясын жогорулатуу жөнүндөгү документтердин,  мамлекеттик жана башка сыйлыктарынын күбөлүгүнүн жана башка документтеринин көчүрмөсү; Кыргыз Республикасынын Ички иштер министрлигинин Маалымат технологиялары боюнча башкы башкармалыгынан берилген соттуулугу жоктугу жөнүндө маалым кат (берилген күнүнөн 3 ай мөөнөтүнөн ашпаган). Баардык документтер делого (скорошиватель) тиркелиши керек жана Сот адилеттигинин жогорку мектебине 2019-жылдын 11-октябрынан тартып 30-октябрына чейин (кошо эсептеп) саат 9:00дөн 17:00 чейин Бишкек шаары, Москва көчөсү, 201 дареги боюнча берилиши керек. Маалымат үчүн байланыш тел.: (0312) 45-47-36. Белгиленген талаптарга жооп бербеген документтерди жана маалыматтарды берген адамдардын ачык сынакка катышуусуна жол берилбейт.