Бишкек, 30.11.22. /Кабар/. КР Жогорку сотунун төрагасы Замирбек Базарбеков Москвада судьялардын Бүткүл россиялык X съездине катышууда. Бул тууралуу Жогорку соттун басма сөз кызматынан билдирди.

Иш-чарага Россиянын президенти Владимир Путин, ошондой эле жогорку инстанциялардан, федералдык арбитраждык соттордон, жалпы юрисдикциядагы соттордон, аскердик соттордон жана дүйнөлүк соттордун 800дөн ашык делегат катышууда.

Замирбек Базарбеков өз сөзүндө судьялардын бүгүнкү жыйыны Россия Федерациясынын сот тутумун чыңдоодогу дагы бир маанилүү кадам болоорун жана анын ишинин жыйынтыгы өлкөдө мыйзам үстөмдүгүн камсыздоого, жарандардын укуктарын жана таламдарын коргоого салым кошоорун белгиледи.

«Сот бийлигинин жогорку органы катары соттордун курултайынын иши чоң мааниге ээ, анткени анда сот тутумунун актуалдуу көйгөйлөрү, сот адилеттигин ишке ашыруунун башкы маселелери талкууланып, өлкөнүн бардык сот системасы үчүн маанилүү чечимдер кабыл алынат. Сот бийлигинин азыркы абалын жана аны өнүктүрүүнүн жолдорун аныктап, соттордун ишин жакшыртуунун артыкчылыктуу максаттары жана милдеттери көрсөтүлөт.

Ошону менен бирге, судьялардын съездинин иши сот системасы үчүн да, бүтүндөй өлкө үчүн да маанилүү, анткени сот системасы судьялардын кесиптик ишинин чөйрөсү гана эмес, ошондой эле өлкөнүн жана анын миллиондогон жарандарынын тагдыры түздөн-түз көз каранды болгон мамлекеттик институт болуп саналат», — деди Замирбек Базарбеков.

Белгилей кетсек, судьялардын Бүткүл россиялык X съезди 29-ноябрдан 1-декабрга чейин уланат.

http://kg.kabar.kg/news/zamirbek-bazarbekov-moskvada-sud-ialardyn-s-ezdine-katyshuuda/