2020-жылдын 18-февралында Тоң райондук мамлекеттик администрациясынын башчысы Данияр Арпачиевдин райондун эли менен жолугушуусуна Тоң райондук сотунун төрайымы Асел Сыдыгалиева катышты. Иш-чара мамлекеттик органдардын, жеке ишканалардын жетекчилери жана жергиликтүү элдин катышуусунда Төрт-Күл айыл өкмөтүнүн имаратында болуп өттү.

Жыйында Асел Сыдыгалиева 2019-жылда сотко түшкөн арыздардын ичинен никени бузуу, ата-энелик укуктан ажыратуу, жаранды өлгөн деп жарыялоо, туулгандыгын аныктоо боюнча арыздар көп түшкөндүгү тууралуу маалымат берип, талдоосу менен бөлүштү. Аталган арыздардын көпчүлүгүн сотко чейин чечүү жолдору тууралуу кыскача маалымат берди. Ошондой эле, төрайым жарандар мамлекет кепилдеген юридикалык жардамдарды алууга же кеп-кеңеш алуу үчүн мамлекеттик жактоочуларга кайрылууга укуктуу экендигин түшүндүрдү.

Мындан тышкары, Асел Сыдыгалиева жакында жарандардын көйгөйлүү маселелерин сотко жеткирбей, жер-жеринде натыйжалуу чечүү үчүн аксакалдар сотторуна методикалык жардам көрсөтүлүп,  окутуулар уюштурулаарын белгилеп кетти.

Тоң райондук сотунун төрайымы айылдык жыйынга келгендигин эл жакшы кабыл алып, ыраазычылык билдиришип, алдыда боло турган жолугушууларга чакырышты.

Ысык-Көл облустук сотунун басма сөз катчысы

Гульзада Аширбаева