Жакында Нарын райондук соту “Кыргыз Республикасынын сот системасы жана реформанын натыйжалары” — деген темада ачык эшиктер күнүн өткөрүштү. Ачык эшиктер күнүнүн меймандары Нарын районундагы Орто-Нура айылынын Б.Бекжанов атындагы орто мектебинин 8-жана 10-классынын окуучулары болушту. Окуучуларды райондук соттун төрагасы Р.Калдыбаев менен судья Э.Болотбеков кабыл алышып, соттук реформанын алкагында жүрүп жаткан иштер, жаңы кабыл алынган кодекстер, санариптештирүү, автоматташтырылган маалымат системасынын киргизилиши сыяктуу маселелер боюнча кеңири маалымат беришти. Жолугушуунун жүрүшүндө окуучулар өздөрүн түйшөлткөн суроолорун беришип, алар боюнча тиешелүү жоопторду  алышты. Мындан сырткары келечекке кесип тандоо боюнча да ой максаттар ортого салынып, өз элинин мыкты уул-кыздарынан болуп өсүүлөрү үчүн акыл-насааттар айтылды. Жолугушуунун соңунда райондук соттун төрагасы Р.Калдыбаев окуучуларды Нарын райондук сотунун имараты, анда иштеп жатышкан аппарат кызматкерлери менен тааныштырып, сот имаратында чакан экскурсия жасалды. Мектеп окуучулары биринчи жолу сот имараты менен таанышкандарын, башкача сезимдерге ээ болушканын, башкысы сот тутуму боюнча маалыматтары кеңейгенин айтышып, жолугушууну уюштурушкан райондук соттун жетекчилигине ыраазычылыктарын билдиришти. Нарын облустук сотунун басма-сөз кызматы    

Талас облустук сотунун 2020-жылдын биринчи жарым жылдыгына карата түзүлгөн иш планы боюнча Талас облустук сотунун төрагасынын орун басарлары Омурлан Тункатаров, Жекшеналы Курманбаев жана судьялары Курал Эстебесов, Айнура Султаналиева жана судьялардын жардамчылары 2020-жылдын 16-мартында Талас облусунун биринчи инстанциядагы сотторуна соттук иштерди кароодо мыйзамдардын туура колдонулушу боюнча практикалык жардам көрсөтүү, жалпы иш алып баруу жана жергиликтүү соттордо жүргүзүлүп жаткан иш чараларды аткаруу боюнча Бакай-Ата райондук сотуна иш сапары менен барып келишти. Талас облустук сотунун судьялары 2019-жылдын ичинде каралган жазык, жарандык иштерине жана соттук материалдарга кароо жүргүзүшүп, аныкталган кемчиликтер боюнча биринчи инстанциядагы судьяларга түшүндүрмөлөрүн беришти. Ошондой эле, райондук соттун жалпы бөлүмүндө  иш алып баруу боюнча, анын ичинен иштерди тариздөө, күчүнө кирген соттук актыларга аткаруу барактарынын жазылышы, соттук иштердин “act.sot.kg” сайтына киргизилиши жана эсептик-статистикалык карточкалардын толтурулушу текшерилип, автоматташтырылган маалыматтык системасынын (АИС) киргизилиши боюнча маалымат алынды.      

2020-жылдын 16-мартында Талас облустук сотунун төрагасынын орун басарлары Омурлан Тункатаров, Жекшеналы Курманбаев жана Бакай-Ата райондук сотунун төрагасы Нурмухамбет Кермалиев  Талас облусунун Бакай-Ата районунун мамлекеттик администрациясынын акими Чолпонкул Төрөкулов, укук коргоо органдарынын, өз алдынча башкаруу органдарынын өкүлдөрү, жергиликтүү аксакалдар сотторунун мүчөлөрү жана жайыт комитетинин өкүлдөрү менен жолугушуу  өткөрүштү. Жыйында 2019-жылдын  1-январынан баштап колдонууга киргизилген жаңы кодекстердин жана мыйзамдардын, “Аксакалдар соттору” жана “Пробация жөнүндө” мыйзамдарынын колдонулушу жана тергөө-судьясы жөнүндө кеңири маалыматтык түшүндүрүү иш чаралары жүргүзүлдү. Акназаров жана Миң-Булак айыл аймактарынын аксакалдар сотторунун төрагалары Калыгул Асылбеков менен Түйтөбек Рахмателдиев судьяларга кайрылып, жалпы Талас облусу боюнча аксакалдар сотторунун бирдиктүү иш алып баруусун жакшыртуу максатында Талас облусундагы аксакалдар сотторуна мыйзамдарды туура колдонуу үчүн практикалык жардамдарды көрсөтүүнү сунушташты. Мындан тышкары, Бакай-Ата райондук мамлекеттик администрациясынын өкүлдөрү Кыргыз Республикасынын Бузуулар жөнүндө кодекси боюнча кеңири семинар өткөрүүнү суранышты. Судьялар жогоруда келтирилген сунуштар боюнча жакынкы арада жолугушууларды өткөрүүнү убадалашты.  

Ысык-Көл облусунун Ак-Суу райондук сотунун  төрагасы Нурдин Ибраимовдун  жетекчилиги менен  ишембилик өткөрүлдү.  Иш чарага райондук соттун судьялары Эрмек Шаршеев, Руслан Маматкулов, Эльдарбек Мамыров, Ак-Суу районунун прокурорунун орун басары Улан Сулайманов, соттун  кызматкерлери   жана  сот приставдары катышышты. Соттун имаратынын айланасы ирээтке келтирилип,  бардыгы 15 көгүлтүр карагайы жана 15 пихта карагайы  отургузулду. Карагайлардын көчөттөрү В.П.Фатунов атындагы  Ак-Суу  токой тажрыйба чарбасынын колдоосу менен алынган. Аймактардын тазалыгын сактап, санитардык абалын жакшыртуу жана жашылдандыруу максатында  облус боюнча үч айлык жарыяланган. Андыктан, жаз айларынын ар аптасынын соңунда соттун имаратынын аймагында ишембиликтерди өткөрүү улантылмакчы.   Ысык-Көл областтык сотунун басма сөз катчысы  Гульзада Аширбаева

2020-жылдын 12-март күнү Ош областынын төрагасынын орун басары Элнара Мадмарова жана Ноокат райондук сотунун судьясы Абдимавлян Бодоев Ноокат районунун Н.Крупская жана К.Каримов орто мектептеринин окуучулары менен  жолугушуу өткөрүштү. Иш чаранын жүрүшүндө судьялар  Ноокат районунун мектептеринин окуучулары менен “Мен сот тутуму жөнүндө билем” деген аталыштагы темада жолугушуу өткөрүшүп,  анда Кыргыз Республикасынын сот бийлиги, Кыргыз Республикасынын Жогорку сотунун жана жергиликтүү сотторунун түзүлүшү, судья деген ким жана кантип судьялык кызматка дайындалуусу, анын сот отурумундагы ролу жана судьянын Абийир кодексинин кээ бир орчундуу жерлерине  айтып беришти. Ошондой эле сот бийлигинин керектигинин себептерин, сот отурумдарынын катышуучулары, алардын орду, сот иштеринин өндүрүштөрү боюнча айырмачылыктарын айтып, жарандардын укуктары бузулганда кайсы органдарга кайрылышы керек экендиги жөнүндө маалымат беришти. Жолугушуунун соңунда судьялар балдардын укугун коргогон ченемдик-укуктук негиздер жөнүндө айрым маселелер боюнча, балдарга болгон ата-энелердин милдеттери туурасында токтолушуп, өздөрүнүн бул  багыттагы иштер боюнча тажрыйбалары менен бөлүшүштү.     Ош областтык сотунун басма сөз катчысы Б.Осмонкулов  

Нарын облусунун  Жумгал райондук соту тарабынан 5-март  Кыргыз Республикасынын сот кызматкерлеринин кесиптик күнүнө  райондогу мектеп окуучуларынын арасында  “Адам жана укук”, “Сот менин көз карашым менен “,”Мен сот болсом”, “Азыркы соттун орду жана келечеги”,”Сот системасынын Кыргыз Республикасына  кошо турган салымы”  деген аталыштардагы  дил баяндардын темалары таратылып берилген эле. Жумгал райондук мамлекеттик администрациясынын жыйындар залында  жогорудагы  дил баяндардын жыйынтыгы чыгарылып, ага райондук админстрация башчысынын орун басары  Ф. Өмүралиева катышты. Комиссия мүчөлөрүнүн чечими менен биринчи орунду Солтобеков атындагы орто мектептин 11 –классынын окуучусу Жылдызбек кызы Айзада, экинчи орунду С.Турусбеков атындагы орто мектептин  8-классынын окуучусу  Максатбек кызы Ажар, үчүнчү орунду К.Акиев атындагы орто мектептин 11-классынын окуучусу Бакирова Бактыгүл жеңип алышты. Мындан сырткары жети окуучуга кызыктыруучу сыйлыктар тапшырылды. Алардын арасына бир сыйлык райондук прокуратура тарабынан тапшырылды. Салтанаттуу иш чаранын соңунда Кыргыз сотунун 95 жылдыгына карата Жумгал райондук соту тарабынан даярдалган видео тасма  көрсөтүлүп, Чыңгыз Айтматовдун 90 жылдыгына жана Кыргыз Республикасынын сот түзүмүнүн 95 жылдыгына карата Жумгал райондук сотунун кызыматкерлери даярдашкан чакан сценка менен жыйынтыкталды.          Нарын облустук  сотунун           басма сөз кызматы.

Нарын облусунун  Ак-Талаа райондук сотунда   жыл башында бекитилген иш планга ылайык,  райондук соттук аткаруучулар кызмат бөлүмүнүн   жана Ак-Талаа району боюнча салык кызматынын кызматкерлери менен мамлекеттин пайдасына өндүрүлгөн сот актыларынын аткарылышын жакшыртуу боюнча кенешме өткөрүлдү. Кыргыз Республикасынын Конституциясынын 100-беренесине ылайык,  Кыргыз Республикасынын  сотторунун мыйзамдуу күчүнө кирген актылары баардык мамлекеттик органдар, жергиликтүү  өз алдынча башкаруу органдары, кызмат адамдары жана жеке адамдар үчүн милдеттүү жана республиканын бардык аймактарында аткарылууга тийиш. Андыктан, кенешменин  жүрүшүндө Мамлекеттик алымдарды өндүрүү жөнүндө  тиешелүү  иштердин  өз убагында аткарылышы боюнча саресеп салынып, милдеттер белгиленди. Ошондой эле, бул күнү айып пулдар боюнча соттук актылардын аткарылышы жана коррупцияны  алдын алуу боюнча маселелер талкууланды.                           Нарын облустук сотунун                          басма сөз кызматы

Бул темага Баткен облусунун райондор аралык сотунун төрагасы Мелис Жаманкулов Баткен районунун айыл өкмөттөрүнүн өкүлдөрү жана алардын жооптуу катчылары, прокуратура, жергиликтүү өз алдынча башкаруу органдары менен жолугушуу учурунда токтолду. Анын айтымында бул багытта эң биринчиден прокуратура, укук коргоо жана жергиликтүү бийлик органдары иш алып баруусу зарыл. Анткени карапайым эл башынан өткөрүп жаткан көйгөйлөрүн биринчи эле жогоруда белгиленген органдарга билдирет, айрым учурларда тийиштүү түшүндүрүү иштери жүрбөгөндүктөн жана укуктук билимдин төмөндүгүнөн жарандарыбыз көптөгөн убаракерчиликтерди тартып, негизсиз чыгымдарга дуушар болушууда. Жолугушуунун жүрүшүндө Баткен облусунун райондор аралык сотунун судьясы Таир Туленбаев судьялар жергиликтүү өз алдынча башкаруу органдарына сотторго берилген ыйгарым укуктардын чегинде усулдук жардам көрсөтүүгө дайым даяр экендигин белгилеп, айрым маселелерди чогу чечүүгө чакырды. Ошондой эле, жолугушууда тараптар Кыргыз Республикасынын административдик сот өндүрүшүндө колдонулуучу Административдик-процесстик Кодексинин жана Кыргыз Республикасынын Жогорку сотунун Пленумунун токтомдорун практикада колдонуу, ошондой эле аймакта иш алып барууда жаралган көйгөйлөр, мүчүлүштүктөр жана аларды жоюу жолдорун, жогоруда аталган органдардын өз ара кызматташуусун жакшыртуу маселесин талкуулашты. Ал эми  катышуучулар судьяларды демилгелери үчүн алкап,  укуктук билимди өркүндөтүүчү пайдалуу маалымат алышканын белгилешти. Жыйындын соңунда судьялар катышуучуларга жолугушууга келгендиги үчүн  ыраазычылык билдиришип, иштерине ийгиликтерди каалашты.

2020-жылдын 9-мартында Талас шаардык сотунун төрагасы Азирет Медеров жана судьялар Айнура Иманалиева, Акылбек Турусбеков, Эсенбек Султановдун катышуусунда Талас шаарынын жергиликтүү өз алдынча башкаруу органдары, аксакалдар сотторунун мүчөлөрү, медиаторлор, прокуратура жана ички иштер органдарынын өкүлдөрү, ошондой эле сот приставдары менен жыйын өткөрүштү. Жыйында, колдонууга киргизилген жаңы кодекстердин жана мыйзамдардын, “Аксакалдар соттору жөнүндө” жана “Медиация жөнүндө” Мыйзамдарынын колдонулушу тууралуу талкуулар болуп өттү. Талас шаардык сотунун төрагасы Азирет Медеров аксакалдар сотторунун жана медиаторлордун иштерин жакшыртуу, ошондой эле жергиликтүү өз алдынча башкаруу органдары жана укук коргоо органдары менен бирдикте иш алып баруу демилгесин көтөрдү. Талас шаарынын вице-мэри Асель Күрүчбекова “Аксакалдар соту жөнүндө” Мыйзамына ылайык Талас шаардык кеңештин сессиясында аксакалдар сотуна финансылык жана материалдык-техникалык жактан камсыздоо чечилгенин билдирди. Ал эми, аксакалдар сотторунун мүчөсү Жыргалбек Жумабаев аткарылып жаткан иштерге ыраазычылык билдирип, аксакалдар сотторунун мүчөлөрү жаңы шайланышкандыгын, аксакалдар сотторунда иш жүзүндө болуп жаткан көйгөйлөр боюнча айтып өттү. Бул боюнча жыйынга катышкан судьялар, прокуратура жана ички иштер органдарынын өкүлдөрү аксакалдар сотторунун иш алып баруусуна көмөктөшүүнү билдиришти. Талас шаардык сотунун төрагасы Азирет Медеров жана судьялар жыйындын аягында иш чаранын катышуучуларына ыраазычылык билдиришип, аксакалдар соту, медиаторлор, жергиликтүү өз алдынча башкаруу жана укук коргоо органдары  менен тыгыз байланышта иш алып барууну макулдашышты.                                                                                                                                                    

Баткен облусунун Лейлек райондук сотунун төрагасы Э.Б.Абдимиталипов, судья Н.Н. Турдалиев жана Лейлек району боюнча медиатор  Д. А. Суханбердиев менен биргеликте Кулунду, Жаңы-Жер, Маргун, Бешкент айыл аймактары боюнча аксакалдар сотторунун төрагалары жана мүчөлөрү менен жолугушуу өткөрүштү. Жолугушууда аксакалдар сотторунун иш алып баруусу менен таанышып, жарандардын ортосундагы талаш-тартыштар боюнча иштерди кароодо мыйзамдуулуктун сакталуусу боюнча усулдук жардам көрсөтүлдү. Жолугушуунун жыйынтыгында, Лейлек райондук сотунун төрагасы Э.Б.Абдимиталипов катышуучуларга иштерине ийгилик каалашып, мындай жолугушууларды өз ара кызматташууну жакшыртуу үчүн  уюштуруп турарын билдиришти.