2019-жылдын 24-августунда, Тогуз-Торо райондук сотунун уюштуруусу менен Жалал-Абад областтынын жергиликтүү сот тутумунун кызматкерлери арасында кичи-футбол таймашы болуп өттү. Бул спорттук мелдеште жалпысынан 6 команда ат салышты.
Ар бир команда футбол боюнча өздөрүнүн мыкты даярдыгын көрсөтүшүп, турнир башынан аягына чейин өтө курч атаандаштыкта жана абдан кызыктуу өттү. Жыйынтыгында мыкты деп табылган 3 командага кубок, грамота жана акчалай сыйлыктар тапшырылды.
Биринчи орунду жана турнирдин өтмө кубогу менен Сузак райондук сотунун кызматкерлери багындырышса, экинчи орунду Кара-Көл шаардык сотунун кызматкерлери алышты. Ал эми үчүнчү орунга Жалал-Абад шаардык сотунун командасы татыктуу болду.
Мындан сырткары мелдештин шартында көргөзүлгөн “мыкты дарбазачы”, “мыкты коргоочу”, “мыкты оюнчу”, “мыкты чабуулчу”, “мыкты уюштуруучу” номинациялар боюнча да татыктуулар аныкталып, грамоталар менен сыйланышты.
Жалал-Абад областтык сотунун басма сөз катчысы
