Кыргыз Республикасынын Жогорку Сотунун төрайымы Нургуль Бакированын Түркия Республикасынын Кассациялык сотунун төрагасы Мехмет Акарджа менен эки тараптуу жолугушуусу видеоконференция аркылуу өттү.
Тараптар эки өлкөнүн жогорку сот органдарынын ишмердүүлүгүнө байланышкан маселелерди талкуулашып, өз ара достук мамилени ырасташты.
Нургуль Бакирова кесиптешине жакында Бишкекте өткөн ШКУга мүчө -мамлекеттердин Жогорку сотторунун он алтынчы кеңешмеси, сот тутумуна байланышкан мыйзам долбоорлору Жогорку Кеңеш тарабынан кабыл алынгандыгы туурасында маалымат берди. Мамлекет башчысы кол койгондон кийин бул мыйзамдар күчүнө кире тургандыгын белгиледи.
Сүйлөшүүлөрдүн жүрүшүндө Нургуль Бакированын түрк тилдүү өлкөлөрдүн Жогорку сотторунун төрагаларынын Кеңешин түзүү демилгесин талкуулоо болду. Мехмет Акарджа бул демилгени толук колдой турганын билдирди. Тараптар бул багытта конструктивдүү өз ара аракеттенүүнүн мүмкүн болгон жолдорун талкуулашты.
Ошондой эле Нургуль Бакирова кесиптешин келе жаткан Түрк Республикасынын күнү менен куттуктады. Бул майрам 1923 -жылы Түркия Республикасынын жарыяланган күнү катары, жыл сайын 29 -октябрда белгиленет.
Сүйлөшүүлөрдүн соңунда тараптар мындан ары дагы кызматташтыктарды уланта тургандыктарын билдиришти.
