Ош шаарында 30-майда сот процессинин катышуучуларынын жүрүм-турум эрежелеринин долбоорунун акыркы талкуусу болду.
«Юристтердин келишими (Кредо) принциптерин колдонуу жана сактоо» темасындагы тегерек столдун ишине Баткен, Жалал-Абад, Ош облустарынын судьялары, прокурорлору жана адвокаттары катышууда.
Иш-чара Кыргыз Республикасынын судьялар Ассоциациясы тарабынан сот адилеттигинин субъекттеринин ортосундагы өз ара кесиптик жоопкерчилик жөнүндө меморандумду ишке ашыруунун алкагында уюштурулду.
Буга чейин Нарын, Ысык-Көл, Талас жана Чүй облустарынан келген катышуучулар, ошондой эле соттор Кеңешинин, прокуратуранын, адвокатуранын тартип комиссияларынын мүчөлөрү менен талкуулар болгон.
КР судьялар Ассоциациясынын эксперттери Венера Болтобаева жана Бекболот Джаналиев февраль айында Кыргыз Республикасынын Жогорку сотунун, КР Башкы прокуратурасынын, КР Юстиция министрлигинин жетекчилиги кол койгон сот өндүрүшүндө өз ара кесиптик жоопкерчиликти күчөтүү боюнча түзүлгөн Меморандум менен катышуучуларды тааныштырышты.
Ошондой эле, катышуучуларга «Укук булагы» долбоорунун алкагында жүргүзүлгөн «Соттук териштирүүдө сот процессинин катышуучуларынын жүрүм-турум эрежелерин жөнгө салуу боюнча мыйзамдарды талдоо» ишинин жыйынтыктары сунушталды.
Сот процессинде тартипти сактоо боюнча практикалык жагдайлар талкууланып, документтин долбоорун толуктоо боюнча иштер жүргүзүлдү.
Катышуучулар сот процессинин катышуучуларынын жүрүм-турумун жөнгө салуучу мындай механизмдин зарылдыгын белгилешти, ал сот адилеттигин ишке ашыруунун натыйжалуулугун жана сапатын жогорулатып, жарандардын ишенимин арттыраарын белгилешти.
Кыргыз Республикасынын Судьялар Ассоциациясы тегерек столдордо айтылган ой-пикирлерди, алынган сунуштарды эске алуу менен бардык аймактардын юридикалык кесиптеринин өкүлдөрү менен болгон жолугушуулардын жыйынтыгы боюнча «Сот процессинин катышуучуларынын жана соттук териштирүүгө катышкан башка адамдардын жүрүм-турум эрежелеринин» долбоорун жыйынтыктайт, ал андан кийин меморандумдун тараптарына кароого жана андан ары колдонууга берилет.
