Кыргыз Республикасынын Жогорку сотунда  соттордун автоматташтырылган маалыматтык системасын Кылмыштар жана жоруктар бирдиктүү реестрине интеграциялоо  боюнча маселелерди талкуулаган жыйын болуп өттү. Иш чарага Жогорку соттун Аппарат жетекчисинин орун басары Эркин Искаков, Башкы прокуратуранын укуктук статистиканы жана каттоону башкаруу бөлүмүнүн башчысы  А. Усупбеков, «Айти Сервис» мамлекеттик мекемесинин директору  У. Юсупов, “Бизнес жана инновациялар” борборунун  директору Д. Кенжалиев,  Сот департаментинин алдындагы  «Адилет сот»   маалыматтык технологиялар боюнча мекемесинин  башкаруучусу  А. Юрьев   жана  аталган мекемелердин бир катар адистери катышышты.

Жолугушууда соттордун автоматташтырылган маалыматтык системасын Кылмыштар жана жоруктар бирдиктүү реестрине интеграциялоодогу  техникалык мүчүлүштүктөр, алардын алдын алуу маселелери талкууланды.

Соттордун автоматташтырылган маалыматтык системасы  санариптештирүүнүн алкагында ишке ашырылууда. Аталган системаны кошуу  аракеттери  2017-жылы башталып, бүгүнкү күндө республика боюнча биринчи инстанциядагы 64 сотко  толук киргизилип, ийгиликтүү иштеп келет. Учурда  кылмыштар жана жоруктар бирдиктүү реестри менен маалыматтарды бөлүшүү модулун иштеп чыгуу боюнча иштер  жүрүп жатат.