2023-жылдын 3-февралында  Жалал-Абад облустук сотунун төрагасы Каныбек Токтосун уулу өзгөчө кырдаал жарыяланган Майлуу-Суу шаарына Сот департаментинин Жалал-Абад облустук башкармалыгынын башчысы Алмаз Токтосунов менен бирге Майлуу-Суу шаардык сотуна барышты.

Кызматтык иш сапардын алкагында аба-ырайынын кескин төмөндөп кетүүсүнөн жабыр тарткан Майлуу-Суу шаардык сотунун иш бөлмөлөрүнүн, сот отурум залдарынын жылуулугун жана дайындалган иштер кандай тартипте өткөрүлүп жаткандыгын көрүп чыгышты.

Эске салсак, 2023-жылдын январь айынын башында Майлуу-Суу шаарында катуу сууктан улам суу кампасындагы түтүктөр тоңуп, андан соң отканаларга суу толук келбей, жылуулук берүү дагы үзгүлтүккө учураган. Натыйжада, Майлуу-Суу шаарында өзгөчө кырдаал жарыяланган.

Иш сапарынын соңунда Каныбек Токтосун уулу судьяларга жана аппарат кызматкерлери отурган бөлмөлөргө жылуулукту камсыз кылуу үчүн Сот департаментинин Жалал-Абад облустук башкармалыгынан кечиктирилгис чаралар көрүлүп, электр жылыткычтар менен камсыздоо маселесин көтөрдү. Ошону менен бирге эле, жергиликтүү соттордун судьяларынын иштерди кароо сапатын жакшыртуу, процессуалдык мөөнөттөрдү, судья жана сот аппарат кызматкерлеринин эмгек тартибин так сактоону талап кылды.

Жалал-Абад облустук сотунун басма сөз катчысы Мирлан Торомаматов